शुक्रबारदेखि प्रदर्शनमा आएको फिल्म 'पाँच पाण्डव'का कलाकारहरू दर्शकसँग भेटघाट र प्रतिक्रिया लिन विभिन्न हल पुगिरहेका छन्। यसैक्रममा अभिनेता हरिवंश आचार्यले फिल्मले दर्शकबाट राम्रो प्रतिक्रिया पाइरहेको बताएका छन्।
हलमा दर्शकसँग प्रत्यक्ष भेटघाट गरेका हरिवंशले फिल्म हेर्ने अधिकांश दर्शकले सकारात्मक प्रतिक्रिया दिएको बताए। उनका अनुसार दर्शकले फिल्मलाई पारिवारिक कथामा बनेको र परिवारसँगै बसेर हेर्न मिल्ने फिल्मका रूपमा लिएका छन्।
'सिनेमा हेर्न आउनुभएका दर्शकले फिल्म राम्रो लागेको बताउनुभएको छ। हेर्ने जति दर्शकले फिल्म मन पराउनुभएको छ,' हरिवंशले भने, 'यो पारिवारिक कथामा बनेको फिल्म भएकाले सबै परिवारसँगै बसेर हेर्न मिल्ने प्रतिक्रिया पाएका छौं।'
फिल्म प्रदर्शनअघि धर्मको विषयलाई लिएर भएको विवादबारे पनि उनले प्रस्ट पारेका छन्। धर्मका नाममा कसैको भावनामा चोट पुर्याउने वा कुनै धर्मलाई नराम्रो देखाउने काम फिल्ममा नगरिएको उनको भनाइ छ।
'धर्मको विषयमा नराम्रो देखाउने र कसैको चित्त दुखाउने काम भएको छैन,' उनले भने, 'कसैको चित्त दुखाउने काम गर्न पनि हुँदैन।'
फिल्म हेरेका दर्शकले पनि धर्मका विषयमा आपत्तिजनक कुरा नरहेको प्रतिक्रिया दिएको उनले बताए।
बसन्त निरौला निर्देशित 'पाँच पाण्डव'मा हरिवंश आचार्य, महेश त्रिपाठी, जितु नेपाल, आर्यन सिग्देल, सुशील सिटौला, इभा गिरी, दीपाश्री निरौला, विनोद न्यौपाने, सरिता गिरी, रमा थपलियालगायत कलाकारको अभिनय छ।
काली रानी फिल्मस्को ब्यानरमा निर्मित फिल्मका प्रस्तुतकर्ता नवीन श्रेष्ठ र निर्माता काली रानी श्रेष्ठ हुन्। फिल्मको कथा, पटकथा तथा संवाद सुशील पौडेलले लेखेका हुन्। महाभारतका पाँच पाण्डवका चरित्र र विम्बलाई आधार बनाएर समकालीन नेपाली समाजको कथा प्रस्तुत गरिएको लेखक पौडेलले बताएका छन्।
श्याम तामाङको छायांकन रहेको फिल्ममा सुप्रिम पराजुलीको सम्पादन छ।
'पाँच पाण्डव'ले सुखद् व्यापार भने गर्न सकिरहेको छैन।
